Omat Tul Aka Den

Woo alah.. 2 minggu nih omat tul aka den. Osah gilo. Tu la deh.. bilo keto rusak camni lah. Umah jawooh lak tu.. kut den jalan kaki maun kuruih monjolang nak sampai Somonyeh dari Shah Alam. Gek eh laaaaa....... hahahaha takpun mampuih topi jalan. Dah mongah jawooh naaa jalan abeh stamina tak cukup napeh gek eh.

~ Cito Minggu Lopeh ~

Seminggu den tido kek opis. Berkampung kato orang. Seb baik den dah prepare sumo eh.. baju, sual, simut, banta.. kiro-kiro eh agak selesolah sambey kojo.. leh yo den berehat dongan seleso. Makan tang siang yo.. tang malam poso. Kodai jawooh. Nak kuwa awak takdo keto. Tahan yo lah.. alah tak kurang doo boghrek den nih kut tak makan seminggu pun. Lex-lex yo lah. Seb baik yo opis den nih kojo 24 jam.. adoyo arah den nih haa.. kut tak???! Mampuih.. mano den nak duduk.

Tang kojo ~ okey! Tang tdo ~ okey! tapi.. yang den tak leh tahan ~ tang nyamuk.. uiisshhh ateh bukit blakang nih ha somak samun. Gilo mengonyam skuad nyamuk nih den raso. Tambah den lak yang tdo.. "uihh gomok orang nih.. sodap ni makan.. darah manihh" kato nyamuk tu (den raso la... huhuhu). Ado satu pagi tu den bangun, tengok ado nyamuk seko dok ontok-ontok ateh mejo. Den agah an.. tak torobang de.. den topok.. melantun darah!! Ayo cilako boto nyamuk nih.. abeh darah den ko tolan yo??! osah konyang sampai nak torobang pun tak buleh. Hahahaha

Sabtu pagi abeh kojo. Nak balik umah laaa... nak basuh baju apo bagai. Idak kang camno lak nak kojo minggu ni kan??! So benjanji la dengon seponoh jiwo.. si Affa nak nolong. Tapi dio nih pesen eh samo yo ngan den. Asal tido yo tak bangkit.. asal tak bangkit yo tido la tu. Omputeh koba win-win situation. Jadi janji eh dio datang nyomput den lopeh Zuhur. Masuk kul 1 tongahari den tengok tipon.. aik apo sonyap yo nih??! Lupo ko?? Den dah kebulur nih. Acik kantin tak niago. Den pun tipon la... niat tu ngojut an si Affa nih bangun tido. Tipon nyo tipon.. 2.30 potang baru idop. Okeh.. bajet dah jago boto la tuh. Den pun siap2.. tumpang staff kek opis sampai Pokan Kajang. Tunggu si Affa kek Stabak Kajang janji eh.

Nak jadi cito lah kan.. tiyem dah kul 4. Sonyap laie.. tak do khabar brito langsung dah goghrak ko bolun. Masuk 4.30 potang den dah beraso lain. Tipun nak mampuih nih. Affa nih tak yo timbul laie. Tipon laaaaaa... seb baik yo janji kek Stabak! Tipun den mampuih leh cucuk cas betri. Tipon laie.. 5.30 baru dapek mesej. Dio sambung tido lik. Emmppphhh... tak le kato apo. Orang dah ngantuk tido lah kan??! Kiro-kiro eh dio bangun tiyem tuh dah abeh tokojut la gek eh.. dio pun siap-siap nyomput den. Jalan pulak jem.. kul 8 malam baru sampai. Den dah naik bengkok nunggu dio dokek 5 jam kek Kajang tu. Takdo lah maghah do.. den golak yo lah. Abeh camno??! Awk patah kaki.. dio nak nolong. Cumo sobab an dio teleno lik tu yang buek lambek tu. Tak po Affa.. apo pun timo kasih bebanyak sobob nolong den. Yang tu laie bosar jaso kut nak dibanding ngan maso den bengkok nunggu ekau tu..

Malam tu, kua ngan Affa. Tengok bola Euro 2012 ~ Spain vs France kek Restoran Spicy Kitchen, Desa Sri Hartamas. Poghut lapa nih.. tak jumpo nasik. Oder la nasik goreng kampung. Bajet sodap lah nih. Skali yang sampai tu.. memang la nasik gorang kampung tapi po lak jadah eh ado KACANG TANAH lam nasik goreng???!!  Ekau ponah jumpo ko orang lotak kacang tanah lam nasik goreng??! Osah gilo mamak nih.. omat tul aka den. Satu kojo lak ngasingkan kacang tu. Den makan nasik lomak pun den tak makan kacang.. ni pulak boh lam nasik goreng. Kut kacang peas tu den leh la timo.. kacang peas abeh gek eh.. tu di lotak eh kacang tanah tu kan???! Gek eh laaa.....

~ Nasik Goreng Kampung Kacang ~

Pueh den, Affa ngn Baa` golak an nasik goreng nih. Polik bona. Kut yo pun nak langga tradisi buek la senonoh sikit. Ini kacang tanah bubuh eh. Game malam tu best.. memang fight. France nampak berusoho koreh nak dapek an gol. Tapi yo lah.. bola tu bulat.. dah dio tak maun masuk gol nak buek camno??! Spain main ok.. tang gelek bola mabelesss tapi tang belari ke ateh ke bawah fail. Lombab nak mampuih. Sakit jiwo nengok eh.. lam tv tu nampak putihhhhhh yo ponoh.. yang meghah eh tak do. Tapi jokie Spain.. lam maleh2 koja bola tu monang yo dio 2-0.

~ Cito Minggu Nih ~

Keto lun berambik laie. Duit eh tak cukup. Tunggu laaa.. ado jokie minggu nih la den amik. Disobab an den nye turn duty malam nih.. den pun sedayo upayo lah arrange nak poie kojo. Seb baik dak umah cuti.. dio tolong nganta den poie komuter. Uissshhh.... bertahun den tak naik KTM Komuter nih. Tokonang waktu zaman blaja marin. Dari Kolumpo lik Somban naik komuter. Lam komuter takdo ektiviti laie bes dari membuto. Tu la kojo den... dulu laaa. Haini naik komuter bodobar yo raso eh.. ingek an nak tido tapi tak kompiden pulak. Dulu naik satu tren yo.. toruih yo sampai bonti kek Somban. Nih naik kek Shah Alam..sampai KL Sentral nak kono tuka tren.. pehtu naik tren arah Somban nak turun eh kek Kajang. Uisshhhh... tak dapek nak membuto nih dooo... kut tak kang tolopeh!!



~ Senarai Stesen Laluan ~ 



Bayar tiket ~ RM4.90. Huish! murah laie naik komuter nih.. den ingek an dah rogo dokek spuloh inggit. Den biaso laaa.... kojo den takde laien ~ perati orang, perati keliling. Baru den tahu.. sekarang naik komuter las stesen bukan Somban laie tapi Sg Gadut. Sg Gadut tu.. kiro eh dopan sikit pado Seremban Jaya, jalan nak poie ko Podeh-Rombau. Dah maju laa... banggo raso eh. Sampai kek KL Sentral bololah den tukar platform.. nak ngoja an tren. Perati laie keliling. Skali tuh baru den perasan.. ado sign board "Ladies Coach". Waaaaa... dah maju boto la KTM Komuter sekarang nih. Gerabak pun leh asing-asing laki ngan pompuan. Yo la.. boto la tuh. Ekau ponah naek komuter lopeh abih kojo??! Sosak wooiii.. belago-lago punggung dalam tu. Jadik den ghaso elok bona laaa buek coach asing untuk pompuan.. kut ponoh sampai belago punggung pun tak do la cito-cito harrasment. Dah lam tu sumo eh pompuan..



~ Tak bape clear plak gambar neyh ~


Di sobab an den nih layak naek coach spesel nih jadi den pun pilih dok kek sini lah. Sajo.. GHAYAT!!! Bondo bukan selalu... hayoon yo lah. Kagum den tengok interior dalam coach nih.. siap ado TV den koba ekau. Tapi TV eh tayang cito katun Tom & Jerry. Apo lak motip tayang cito katun nih??! Gek eh kut ado omak-omak oghang bawak anak eh jalan jadi anak eh takdo la boring bona dok lam ketapi lelomo. Gek eh laaa..... Dalam pado tu den tengok indication laluan kek ateh pintu tu.. canggih boto la.. Ado lampu kolip-kolip. Laluan tren tu dio nyalo lampu wano ijau. Bilo dio sampai kek satu stesen yo lampu yg tulih namo stesen tu tuka jadi wano meghah. Canggih la tu.. dulu takdo. Dulu buek kiro-kiro seniri yo dah sampai mano. Skarang jolas di tunjuk eh ketapi tu dok kek mano.

Memang lolah nyawo den dua minggu nih.. tapi tak po.. macam-macam den tengok. macam-macam den ghaso.. macam-macam yang jadi. Kito nih patut eh bondo apo pun jadi kono rilek. Soba kan separuh iman??! Jadi soba dan rilek ayo.. tak yah sesusah nak kolam kabut sampai serabut. Tak kemano. Tengok yo lah apo pulak nak jadi minggu nih. Harap eh semuo yang elok2.. Amin!!!!

~ p/s : paham ko? sajo yo den tuleh lam loghat NISMILAN..

tak paham tanyo. KONALI BUDAYO KITO!! Ekekeke ~